මම මගේ ජීවිතේ ගත්ත හොඳම තීරණය තමයි මධුර සුපර් ස්ටාර් තරු අතුරින් බිහි වූ ඇය තාරුණ්‍යයේ ආකර්ශනයට නතු වූයේ හඬ පමණක් නිසාම නොවේ. ස්වරූපයෙන් ද සුන්දර වූ නිසා ය. ඒ මේ වනවිට මුළු ලංකාවම හදුණන "නදිනි පේ‍්‍රමදාස" ය. හොඳ නාදයක්, හොඳ හඬක් යන තේරුම ඇතිව ඇයට ‘‘නදිනි’’ යන ඒ නම තබා ඇත්තේ ඇයගේ නැන්දා විසිනි. නැන්දා යෙදු නම අරුත්බර කළඇය "සපු කුසුමේ.... සුවඳ කවා.... රකිමි ඔබේ සුසුම පවා.... දෙතොල කරා කොපුල දිගේ....." යන ගීතයෙන් රසිකයන්ගේ ආදරය දිනා ගැනීමට සමත් වුවා ය. එලෙසින් මිමුනු ඇය දැන් ආදරණීය බිරිඳක් මෙන්ම මවකි. සැමියා සමග මෙන්ම දරුවා සමග කලා කටයුතුත් සමගින් ගෙවන ජිවිතයේ සොදුරු බව පිළිබදව නදිණි පැවසුවේ මෙලෙසින්.
"දැන් මම අම්ම කෙනෙක්...ගොඩාක් සුන්දරව කාලය ගතවෙනවා. බබාට දැන් මාස 08යි. දැන් මම මගේ සංගීත කටයුතුවලටත් දායක වෙනවා. ඒත් වැඩිපුරම කාලය ගෙවෙන්නෙ පුතා එක්කයි. පුතාගේ නම "ආර්යයන් යතීෂ් අබේසිංහ". දැන් මම විවාහ වෙලා අවුරුදු තුනහමාරක් වෙනවා. මධුර එයාගෙ වැඩ රාජකාරි එක්ක කාර්යබහුල වුණත්, අපේ සාමාන්‍ය ජීවිතයට ඒ කිසිවක් පටලවා ගෙන නැහැ..... ඉතාම සුන්දරව ජීවිතය ගෙවෙනවා. හරිම සතුටුයි.
විවාහ වෙලා ඉක්මනින්ම දරුවෙක් හදන්න මගේ අකමැත්තක් තිබුණෙ නැහැ...... විවාහවෙලා වසර දෙකහමාරක් විතර හිටියෙත් උපාධියෙ වැඩ ඉවර වෙනකල්. 23 දී විවාහ වුණා. තුන්වැනි සංවත්සරය සමරන විට මවක් වෙලා. ඉතින් සංගීත ජීවිතය වගේම පුද්ගලික ජීවිතයේ හැම දෙයක්මත් සමබරව සිද්ධ වෙන්න ඕනෑ..... එවිට ආපස්සට හැරිලා බලද්දී සතුටු වෙන්න පුළුවනි.
ඇත්තම කිව්වොත් බබා ලැබෙන්න හිටිය දී මම කිලෝ 22 කින් බර වැඩි වුණා. හිටියට වඩා තෙගුණයකින් මහත් වුණා කිව්වොත් හරි. ඊට පස්සෙ හිටියා වගේම නැවත නම්‍යශීලී සිරුරක් හදාගන්න මම පුදුමාකාර විදියට කැපවුණා.
අනවශ්‍ය කෑම සියල්ල නැවැත්තුවා. සීනි සහ තෙල් සහිත කෑම සම්පූර්ණයෙන්ම වාගේ නැවැත්තුවා. කන්න ආස වුණත් නොකා හිටියා. පුදුමාකාර විදියට ව්‍යායාම්වල යෙදුණා. ආසම කළ පැණි රස කැවිලි පවා කෑවෙ නැහැ..... දැන් ඉස්සර හිටිය නදිනිම තමයි මේ..... බබා ලැබෙන්න සිටිය දී මගේ තරබාරුකම නිසා සමහරු මාව අඳුරගන්න නැතුවත් ඇති.
ජීවිතය සුන්දර වගේම විටෙක අසුන්දර දේවල්වලටත් මුහුණදෙන්න සිද්ධ වෙනවා. මොන දේ වුණත් ජීවිතයට මුහුණ දෙන්න ඕනෑ..... ඒ එන සියල්ලට සතුටින් මුහුණදීම තමයි වැදගත්. ඇත්තටම මධුර හොඳ තේරුමක් ඇති සැමියෙක්. මගේ සෑම දෙයකටම එයාගෙ උපරිම දායකත්වය ලබා දෙනවා.
රාත‍්‍රි ප‍්‍රසංගයක් තිබුණත් මා එක්ක ඇවිත් පාන්දර නිදාගෙන ආපහු රාජකාරිවලටත් යනවා. ජීවිතේ වෙහෙස ගැන හිතන්නේ නැහැ..... සත්තකින්ම මම මගේ ජීවිතේ ගත්ත හොඳම තීරණය තමයි ‘‘මධුර’’ තෝරා ගැනීම.
පසුගිය දිනවල ‘‘දිලිසෙන දෙනෙත ඔබේ....’’ ගීතය නිසා මම ගැන වැඩි කතා බහට ලක් වුණා. මේ ගීතය හැමෝටම රස විඳිය හැකි ආදරණීය ගීතයක්. ඒක ගොඩාක් ජනප‍්‍රිය වුණා. හැමෝටම දැනිච්ච සහ දැනෙන ආදරයක් ඒ තුළ තියෙන්න ඇති..
තව අලූත් ගීතයක් මේ දිනවල නිර්මාණය වෙනවා. අවුරුද්දකට විතර පසුව තමයි මේ විදියට අලූත් ගීතයක් නිර්මාණය වෙන්නෙ. තව මාස එකහමාරක දී එය එළිදැක් වේවි.
මම හිතන්නෙ මම කරළියට ආවේ ලංකාවේ වඩාත්ම ජනප‍්‍රිය වෙච්ච තරගාවලියෙන්. එනම් දෙවැනි සුපර් ස්ටාර් රියැලිටි අදියරෙන්. පසුව තවත් තරගවලින් තරු බිහි වුණත්, එදා ඒ දෙවැනි රියැලිටි එකෙන් ආපු බොහෝ දෙනෙක් දුරගමනක් යමින් සිටිනවා.
ඒ වගේම ලංකාවේ මෙතෙක් පැවැත් වූ රියැලිටි තරගවලින් බිහි වූ හොඳම ගායන ශිල්පින් ලෙස මම දකින්නේ සුරේන්ද්‍ර සහ සංඛ දිනෙත්. ඔවුන් වඩා දක්‍ෂ ගායකයින් බව පෙනෙනවා. ඔවුන් සුවිශේෂී හඬක් ඇති දෙදෙනෙක්....."
No comments:
Post a Comment